Милионер, колку добро звучи. Тоа е човек чиешто нето богатство е еднакво или надминува еден милион единци од одредена валута. Тоа е најпосакуваниот епитет, кој прв пат е употребен во 1719 година, во Франција. Дефиницијата ја знаеме сите, а потеклото на зборот и не е толку битно. Нам ни треба рецептот за да го заслужиме овој епитет. т.е. начинот да станеме милионер.
Иако постоеше многу лесен начин да се стане милионер, само да се одговори точно на 20тина прашања, сепак никој не успеа. Тоа само ни докажа дека патот до милионот и не е така лесен. Тоа ќе го потврдат и најбогатите луѓе на светот, кои објаснуваат дека своето богатство го стекнале со многу труд, знаење, ризик. Карлос Слим, Ворен Бафет, Бил Гејтс. Ви звучат познато? Се разбира, сите сакаме да се најдеме во нивно друштво. Да, тоа се луѓето кои седум години во континуитет се наоѓаат на првите 3 места најбогати луѓе на светот според американскиот бизнис магазин „Форбс“. Иако дејствуваат во различни области: финансии, трговија, комуникации, технологија, метална индустрија, сите имаат исти карактеристики. Тие се милијардери, бизнис магнати, инвеститори и едни од највлијателните луѓе во светот. Тие се неприкосновени филантропи кои голем дел од своето богатство го донираат во добротворни организации и научно-истражувачки програми. Тие се луѓето кои го обликуваат светот. Во друштво на овие тројца, има уште 1223 милијардери чие вкупно богатство во 2012 година изнесува 4.6 трилиони долари. Многу нули за броење. И замислете, и еден Македонец е дел од оваа листа. Мајк Илич, кој ја поседува најголемата бизнис империја во Мичиген каде работат над 6000 исселеници. Во 2011 година, неговото богатство беше проценето на 2.6 милијарди долари, што му го донесе 181-то место на листата најбогати луѓе во светот.
Карлос Слим, најбогатиот човек на светот во 2010, 2011 и 2012 година според „Форбс“
Морам да признаам дека интересот за оваа тема го поттикна една статија објавена пред неколку дена во англиското списание “The Economist” со наслов „Колку време е потребно да се заработи 1 милион долари во различни земји?“. Користејќи го годишниот приход пред оданочување што го заработува главата на едно просечно семејство, истражувањето покажало дека во Америка може најбрзо да се стане милионер, отприлика за 20 години, додека јужно од границата, во Мексико, потребни се три века труд за да се стекне истото богатство. На врвот на листата, веднаш после Америка, се наоѓаат Норвешка, Швајцарија и Австралја, каде во просек се потребни 40тина години за да еден просечен жител се закити со титулата милионер, додека пак Романија е единствената земја после Мексико, каде се потребни неверојатни 350 години за да се изгради милионскиот куп кој нареден во банкноти од 100 долари достигнува над 1 метар висина и околу 10 килограми тежина. И нормално, на листата недостасува една земја. Која ако не, мојата Македонија.
Преку ноќ. Ете толку време е потребно во Македонија, за да се стане милионер. Тука не мислам на еден милион денари, бидејќи тоа и не е кој знае колкаво богатство. Мислам на милиони во двете најсилни светски валути, долари и евра. Со чест на исклучоците, кои изградија империи во металната, прехранбената, фармацевтската индустрија, најголем број од македонските милионери своето богатство го стекнуваат тргувајќи на берза, други чекорејќи по сивиот пат на економијата, а голем е и бројот на луѓе кои станаа милионери за време на фамозната приватизација. Ајде да се се обидеме да пресметаме колкаво е реалното време за да се заработи 1 милион долари во Македонија, користејќи ги истите мерила како и “The Economist”. Ако просечната бруто плата изнесува 30600 денари месечно, односно 367200 денари годишно, потребни се 125 години за да се заработат 46 милиони денари (1 милион долари во денарска противвредност). Но, ова е Утопија. Како се останато во нашата држава, ниту просечната плата не функционира како реално мерило. Зошто? Бидејќи најголем број работници примаат плата далеку помала од просечната, а само мал број поединци имаат месечни приходи со повеќе нули, кои просекот го влечат нагоре.
И за крај, дали профилот на македонските милионери ги има карактеристиките кои ги споменавме погоре? Не, тие не се светски моќници, нивната моќ најчесто е ограничена во нашата мала земја. Поголем број од младите милионери, богатството го имаат наследено од своите предци, а не заработено со сопствен труд. Тие веројатно не се филантропи, и несебично не донираат дел од своето богатство, освен ако од тоа имаат некаква лична корист. Чест на исклучоци, како гореспоменатиот Мајк Илич. Но дали освен потеклото, тој поседува нешто друго од македонскиот менталитет?
М-р Деспина Петреска
Економски аналитичар во “Finance Think”
Comments
Post a Comment