Во изминатиот период актуелна е темата колку има вработени во јавниот
сектор. Со оглед на тоа дека нема конкретни информации на тоа колку луѓе се
вработени во јавната администрација, бројките се енигма. Многубројните огласи
за вработување на Агенцијата за Администрација создаваат слика дека државата е
впрочем и најголемиот работодавач и двигател на вработеноста во Македонија. Но,
покрај квантитетот на огласите, јавниот сектор е атрактивен и од аспект на плата.
Вработените во јавната администрација во просек добиваат 18% повисока плата од
просекот на цела земја. Според Државниот Завод за Статистика, просечната
нето-плата по вработен во 2014 била 21.393 денари, додека просечната плата во
јавната администрација и одбраната изнесувала 25.252 денари. Следствено, се
појавува прашањето колку ја чини државата јавната администрација? Во просек,
на годишно нивно, државата троши околу 22 милијарди денари за плати и
надоместоци на јавната администрација. Иако, овој издаток не забележува
драстичен раст низ годините, овие бројки сепак преставуваат влијателен притсок
врз раcходите во буџетот на Македонија.
Платите и надоместоците учествуваат дури со 13% во вкупните расходи кои државата ги планира за 2015 и се втори по големина после социјалните трансфери. Нивното учество е поголемо и од планираните капитални расходи кои се трети по големина и изнесуваат 12% во вкупните расходи. За разлика од платите и надоместоците, капиталните расходи имаат развојна компонента и би поттикнале економски развој и социјална стабилност во државата. Од друга страна, консолидирањето на буџетскиот дефицит е една од главните препораки од меѓународните институции. Планираниот буџетски дефицит за 2015 е 32% помалку отколку платите и надоместоците кои се планирани за 2015. Па, веројатно ставката за плати и надоместоци во иднина дава можност да биде сметана како потенцијален коректор за буџетскиот дефицит.
Иван Вчков
Економски аналитичар во Finance Think
Comments
Post a Comment